‘तेरवं’ च्या निमित्ताने हरीश इथापे काय बोलणार?

 ‘तेरवं’ च्या निमित्ताने हरीश इथापे यांची संवाद सभा

सामाजिक सांस्कृतिक संस्थांचा सहभाग

वर्धा : शेतकऱ्यांच्या आत्महत्यांकडे शासनाचे आणि समाजाचे लक्ष वेधणारा ‘तेरवं’ हा चित्रपट आंतरराष्ट्रीय महिला दिनी महाराष्ट्रात प्रदर्शित होत असून वैदर्भीय पार्श्वभूमी लाभलेल्या या चित्रपटाचे दिग्दर्शक हरीश इथापे यांची संवाद सभा शुक्रवार, दि. १ मार्च रोजी सायंकाळी ७ वाजता स्थानिक बजाज सार्वजनिक जिल्हा ग्रंथालयाच्या सभागृहात आयोजित करण्यात आली आहे.

शेतकरी कुटुंबातील एकल महिलेच्या संघर्षाची आणि तिच्या सामर्थ्याची मांडणी करणाऱ्या ‘तेरवं’ या चित्रपटाचे कथानक नाट्यलेखक श्याम पेठकर यांचे असून रंगभूमीवर ‘तेरवं’ या नाटकाने महाराष्ट्रात आणि महाराष्ट्राबाहेर आपली छाप यापूर्वी उमटवली आहे. ॲग्रो थिएटर या नवसंकल्पनेमुळे तसेच वैविध्यपूर्ण नाट्यनिर्मिती व सामाजिक उपक्रमांच्या आयोजनामुळे राष्ट्रीय आंतरराष्ट्रीय पातळीवर नावलौकिक प्राप्त झालेल्या हरीश इथापे यांच्या दिग्दर्शनातील या चित्रपटाचे संपूर्ण चित्रीकरण वर्धा व यवतमाळ या सर्वाधिक शेतकरी आत्महत्याग्रस्त असलेल्या जिल्ह्यात झाले आहे. या चित्रपटाच्या निर्मितीमागील भूमिका मांडतानाच हरीश इथापे नाट्य आणि चित्रपट चळवळीविषयीही यावेळी मुक्त संवाद साधणार आहेत. सोबतच या चित्रपटामध्ये विविध भूमिका बजावणाऱ्या आणि आपल्या आयुष्याच्या कर्तृत्ववान नायिका असलेल्या शेतकरी कुटुंबातील लेकी आपले मनोगत व्यक्त करणार आहेत.
वर्धेकर सामाजिक सांस्कृतिक संस्थांचा सहभाग असलेल्या या संवाद सभेला मित्रपरिवारासह उपस्थित राहण्याचे आवाहन संजय इंगळे तिगावकर, मुरलीधर बेलखोडे, डॉ. सचिन पावडे, प्रदीप दाते, विजय कोंबे, डॉ. विभा गुप्ता, प्रा. नूतन माळवी, प्रवीण धोपटे, चंद्रशेखर ठाकरे, जीवन चोरे, डॉ. सुचिता ठाकरे, अविनाश हलुले, पंकज वंजारे यांनी केले आहे.