महसूल सेवांचे वनस्टॅाप सोल्यूशन
जिल्हा प्रशासनाचा नाविन्यपुर्ण उपक्रम
पालकमंत्र्यांच्याहस्ते सेवा केंद्राचे उद्घाटन
Wardha – आशिष इझनकर
वर्धा : राज्याचे वने, सांस्कृतिक कार्य मंत्री तथा जिल्ह्याचे पालकमंत्री सुधीर मुनगंटीवार यांच्याहस्ते महसूल प्रशासनाने तयार केलेल्या आदर्श आपले सरकार सेवा केंद्राचे उद्घाटन झाले. 100 पेक्षा जास्त सेवा याठिकाणी उपलब्ध होणार आहे. जिल्हाधिकारी राहुल कर्डिले यांच्या संकल्पनेतून हे आगळे वेगळे सेवा केंद्र साकारण्यात आले आहे.
केंद्राच्या उद्घाटनप्रसंगी खा.रामदास तडस, आ.डॉ.पंकज भोयर आ.दादाराव केचे, जिल्हाधिकारी राहुल कर्डिले, पोलिस अधीक्षक नूरुल हसन, जिल्हा प्रशासन अधिकारी हर्षल गायकवाड, मुख्याधिकारी राजेश भगत, तहसीलदार राजेश कोळपे उपस्थित होते. एकाच ठिकाणी नागरिकांना शासनाच्या विविध प्रकारच्या सेवा उपलब्ध व्हाव्यात यासाठी जिल्हाधिकारी राहुल कर्डिले यांच्या संकल्पनेतून साकारण्यात आलेले आदर्श आपले सरकार सेवा केंद्र उपक्रम राज्यातील पहिलाच उपक्रम आहे.
लोकसेवा हक्क कायद्यांतर्गत शासनाच्या 100 पेक्षा अधिक सेवा या ठिकाणी वन स्टॅाप सोल्यूशन या तत्वावर उपलब्ध होणार आहे. या सेवांमध्ये जात, अधिवास, नॅान क्रिमेलियर, जात पडताळणी प्रमाणपत्र, रहिवासी दाखला, राजपत्र, पोलिस व्हेरिफिकेशन, फुड रजिस्ट्रेशन, शपथपत्र, शेत मोजणी अर्ज, स्कॅालरशिप अर्ज, पॅनकार्ड, पासपोर्ट, उद्योग आधार प्रमाणपत्र, आभा कार्ड, हयात प्रमाणपत्र, सेंट्रल कास्ट, शॅाप ॲक्ट लायसन, शेतकरी, भुमिहीन, अल्पभुधारक प्रमाणपत्र, निराधार योजना, आयुष्यमान भारत योजना, एन्प्लॅायमेंट कार्ड, एनपीएस, नीट, जेईई, बीएससी नर्सिंग, एनईएसटी आदी सेवा उपलब्ध होणार आहे.
सिधापत्रिकेतील नावात दुरुस्ती, नाव समाविष्ठ करणे, वगळणे, तात्पुरती सिधापत्रिका, पत्ता बदलने, दुय्यम सिधापत्रिका, कुंभार समाजासाठी ओळखपत्र, अभिलेख कक्षातील नक्कल, जनआरोग्य योजनेसाठी पुरवठा विभागाचे प्रमाणपत्र, पोलिस पाटील मुदतवाढ, कर्मचाऱ्यांना स्थायित्व प्रमाणपत्र, विवादग्रस्त फेरफार नोंदीवरील निर्णय, भुसंपादन दाखला, भुसंपादन ना हरकत दाखला, मनरेगा जॅाबकार्ड, लोकसंख्या प्रमाणपत्र, विमा रक्कम मिळण्यासाठी वारस दाखला यासह विविध सेवा या एकाच ठिकाणी उपलब्ध होणार आहे.
या आदर्श सेवा केंद्रासाठी जिल्हा प्रकल्प प्रमुख प्रतीक उमाटे, महाआयटीचे जिल्हा व्यवस्थापन अधिकारी शहजाद शेख तसेच जिल्ह्यातील व्हीएलई बहुउद्देशिय संस्थेचे पदाधिकारी आणि सदस्यांनी विशेष परिश्रम घेतले.
एकाच ठिकाणी मिळतील विविध सेवा – राहुल कर्डिले
सर्वसामान्य नागरिकांना विविध शासकीय सेवा एकाच ठिकाणी उपलब्ध व्हाव्यात या उद्देशाने आदर्श आपले सरकार सेवा केंद्र आपण सुरु केले आहे. या केंद्रांची संख्या आपण वाढवतो आहे. लोकसेवा हक्क कायद्याची जोड या केंद्राला देण्यात आल्याने 100 पेक्षा अधिक सेवा जलद, पारदर्शक पद्धतीने नागरिकांना उपलब्ध होणार आहे. जिल्हा प्रशासन लोकाभिमुख करण्याचा यातून प्रयत्न केला जात आहे.
