गारपिटीने हरबरा पीक झाले उध्वस्त; शेतात हरबरा गळून पडला

शेतकऱ्यांनी तात्काळ पंचनामे करण्याची केली मागणी

पंचनामे लवकर झाले नाही तर आगामी निवडणुकांवर टाकणार बहिष्कार

वर्धा: देवळीच्या विजायगोपाल परिसरातील तांबा या गावात शेती पिकाचे मोठे नुकसान झाले आहे. रब्बी पिकावर शेतकऱ्यांना भिस्त होती, ही भिस्त देखील या अवकाळी पाऊस आणि गारांच्या तडाख्याने हिरावली गेली आहे.

शेतकऱ्याचे हरबरा पीक काढणीला आले असताना गाराचा पाऊस झाल्याने हरबऱ्याचे गाठे शेतातच गळून पडले आहे. आधीच सोयाबीन पिकावरील येलो मोझ्याक रोगाची मदत मिळाली नाही, पीक विमा मिळाला नाही तर काहींना जाहीर करण्यात आलेल्या मदतीच्या रक्कमाच खात्यावर आल्या नाही, अशा परिस्थितीत गार पिटीने शेतकऱ्यांचे कंबरडे मोडले आहे. अद्याप कुठलाही कर्मचारी पंचनामे करायला गावात आले नसल्याने शेतकऱ्यांनी खंत व्यक्त करीत पुढील काळात निवडणुकांवर बहिष्कार टाकावा की काय असाच प्रश्न उपस्थित केला आहे. विजायगोपाल नजीकच्या तांबा गावात शेतकऱ्यांचे मोठ्या प्रमाणात नुकसान दिसून येत आहे.

देवळी तालुक्यातील सुमारे पंचवीस गावामध्ये अवकाळी पावसाने कहर केला आहे. येथे बोराच्या आकाराची गार झाल्याने पिकाचे मोठे नुकसान झाले आहे. देवळी तालुक्याच्या तांबा या गावात गोठ्याच्या बाहेर बांधून ठेवलेल्या गुरांना देखील या गारपिटीचा तडाखा बसला आहे. विजायगोपाल नजीकच्या राघा शिवारात जोरदार गारांचा पाऊस झाल्याने गहू चना तूर पिकाचे नुकसान झाले. येथे असलेल्या एका शेतकऱ्याचा गहू अक्षरशः जमीनदोस्त झाला आहे, शेतीचे एवढे मोठे नुकसान तांबा येथे झाले असताना स्थानिक आमदार येथे पोहचले नसल्याची खंत शेतकऱ्यांनी व्यक्त केली आहे. खासदार रामदास तडस यांनी देवळी तालुक्यातील रत्नापूर गावात पोहचून पिकांची पाहणी केली, सर्वाधिक नुकसान हे विजायगोपाल भागात झाले आहे.