वर्ध्यात १८ फेब्रुवारी रोजी प्रकाश आंबेडकर यांची होणार सभा

सभेसाठी वर्धेकरांमध्ये उत्सुकता..

वर्धा : वर्ध्यात १८ फेब्रुवारी रोजी वंचित बहुजन आघाडीच्या स्वाभिमानी महा एल्गार सभेचे आयोजन करण्यात आले आहे. या सभेसाठी वर्ध्यात स्थळांची चाचपणी केली जात होती, लोकमहाविद्यलय प्रांगण तसेच स्वावलंबी मैदान ही स्थळं सुचविली गेली होती. स्थळाबाबत बऱ्याच चाचपणी नंतर अखेर वर्ध्याच्या बोरगाव मेघे येथील गणेश नगर येथील क्रिकेट मैदान हे स्थळ निश्चित करण्यात आले आहे. येथे सुमारे एक लाख लोक जमतील अशी येथील व्यवस्था आसणार आहे. याबाबतची माहिती वंचित बहुजन आघाडीचे जिल्हा अध्यक्ष मनोज वरखेडे यांनी दिली आहे. वर्ध्याच्या शासकीय विश्रामगृहात वंचित बहुजन आघाडीची जिल्हा आढावा बैठक आणि पत्रकार परिषद पार पडली. १८ फेब्रुवारी रोजी दुपारी दोन वाजता हे सभा होणार आहे. यावेळी पत्रकार परिषदेला वंचित बहुजन आघाडीचे जिल्हाध्यक्ष मनोज वरखेडे, मुख्य समन्वयक डॉ. सुभाष खंडारे, मंगलाताई कांबळे, राजेंद्र साळुंखे, सिद्धर्थ डोईफोडे,महादेव शेंडे, संजय हाडके, वसंत मुराकर, आशिष गुजर , अमोल कोल्हे, दयानंद भटारकर आदी उपस्थित होते.

या सभेला वंचित बहुजन आघाडीचे राष्ट्रीय नेते प्रकाश आंबेडकर संबोधित करणार आहे. सभेला १ लाख लोक येणार असल्याची माहिती जिल्हाध्यक्ष मनोज वरखेडे यांनी दिली आहे.
वंचित बहुजन आघाडीची वर्ध्यात होणारी सभा नेमकी कुठे होणार यावर गेल्या काही दिवसापासून चर्चा सुरू होती. सुरक्षेच्या दृष्टीने देखील स्थळाची चाचपणी सुरू होती. वर्ध्यात लोक महाविद्यालय मैदान आणि स्वावलंबी मैदान या दोन जागा मोठ्या आहेत. येथे पन्नास हजार लोकांपेक्षा जास्त उपस्थिती मध्ये सभा घेणे शक्य आहे. त्यामुळे लोकमहाविद्यलयाचे मैदान मिळावे यासाठी प्रयत्न करण्यात येत होते. पण पार्कींग सुविधा आणि बाहेर गावावरून सभा स्थळी पोहचण्यासाठी करावी लागणारी कसरत यामुळे रेल्वे अथवा बस सुविधा यापासून स्थळ जवळ असावे यादृष्टीने चर्चा झाली आणि वर्ध्यातील बोरगाव येथील गणेश नगर मधील भव्य क्रिकेट मैदान हे स्थळ ठरविण्यात आले आहे. वंचित बहुजन आघाडीचे नेते रेखा ठाकूर, निलेश विश्वकर्मा, राजेंद्र वाकोडे, सर्वजित बनसोडे हे या सभेला उपस्थित राहणार आहे. वंचित घटकांना न्याय मिळावा यासाठी वंचित बहुजन आघाडीची ही महा एल्गार सभा असल्याचे जिल्हाध्यक्ष मनोज वरखेडे यांनी सांगितले. वंचित बहुजन आघाडीचे नेते ऍड. प्रकाश आंबेडकर यांच्या बहुजन, ओबीसी,अल्पसंख्याक, भटके विमुक्त तथा अनुसूचित जाती जमातीच्या लोकसमूहाला जागृत करण्यासाठी महाराष्ट्रात अनेक जिल्ह्यात एल्गार सभा घेतल्या जात आहे. वर्ध्यात याला कसा प्रतिसाद मिळतो तेच पाहणे महत्वाचे आहे.