वर्ध्यातील मावळे करणार शिवछत्रपतींचा जयघोष

वर्ध्यात होणार शिवछत्रपतींचा जयघोष

छत्रपती शिवाजी महाराज चौक मित्रपरिवार यांचा उपक्रम

वर्धा (ब्युरो) : वर्ध्याच्या छत्रपती शिवाजी महाराज चौक येथे शिवाज महाराज यांची जयंती साजरी केली जात आहे. यासाठी पुतळ्याजवळ जय्यत तयारी करण्यात आली असून येथे छत्रपतींचा जीवनपट उकलणारा पोवाडा हा कार्यक्रम देखील आयोजित करण्यात आला आहे. येथे उभारण्यात आलेल्या किल्ला येथील खास आकर्षण आहे. सर्वसामान्य माणसाच्या जयघोषाने वर्ध्यात शिवछत्रपतीच्या इतिहासाचा जागर होणार आहे.

रविवार 18 फेब्रुवारी रोजी जालना येथील शाहीर अरविंद घोगरे पाटील यांच्या आवाजात पोवाडा सादरीकरण होणार आहे. छत्रपती शिवरायांच्या हिंदवी स्वराज्य स्थापनेचा इतिहास उलगडणारा पोवाडा वर्धेकारांच्या पसंतीस उतरणारा आहे. शिवजयंती निमित्त छत्रपती शिवाजी महाराज चौक परिसरात शाहिरी तोफ गडगडणार असून चौक मित्रपरिवार हा उत्सवाच्या तयारीला लागला आहे.

 सायंकाळी सहा वाजता प्रारंभ होणाऱ्या या कार्यक्रमात शाहिरीतोफ गडगडणार आहे. शिवकालीन इतिहासात पोवाडा या गायन कलेला मोठे महत्त्व प्राप्त आहे. लोककला म्हणून तिला राज मान्यता मिळाली आहे. शिवरायांचा इतिहास डफावर थाप देत शाहीर खड्या आवाजात सांगतो, शाहिराच्या श्रीमुखातून बाहेर पडणारे  शब्द तत्कालीन इतिहास डोळ्यासमोर उभे करते. शाहीर पोवाड्यातून  छत्रपती शिवरायांच्या इतिहासासोबतच छत्रपतींची अर्थनीती यावर ते प्रकाश टाकतील. त्यांना साथसंगत करण्याकरिता कलावंताची चमू यावेळी सहभागी असणार आहे. खड्या आवाजात सादर होणारा पोवाडा वर्धेकरांच्या पसंतीला उतरेल यात शंका नाही. आकर्षक रोषणाई, वाद्य वृंदाचा गजर हे यातील आकर्षण आहे.

छत्रपतींच्या किल्ल्याच्या प्रतिकृतीची चौकात झाली उभारणी

छत्रपती शिवरायांनी हिंदवी स्वराज्यासाठी प्राणाची बाजी मारली. आपले जिवलग साथी मावळे महाराजांनी पाहीलेल्या स्वप्नांसाठी कामी आले. प्रत्येक किल्ला जिंकत स्वराज्य स्थापन झाले. वर्ध्यात देखील अशा देखण्या किल्ल्याची प्रतिकृती साकारली गेली आहे. पुतळ्याच्या मागच्या बाजूला उभारण्यात आलेली ही प्रतिकृती सर्वांसाठी आकर्षण ठरत आहे. पन्नास फूट उंच अशा या प्रतिकृतीला पाहत रस्त्याने जाणारा प्रवस्यांना छायाचित्र काढण्याचा मोह आवरत नाही.

शिवजयंतीला होणार रक्तदान

शिवजयंती म्हणजेच सोमवार 19 फेब्रुवारी या दिवशी येथे रक्तदान शिबिराचे आयोजन करण्यात आले आहे. रक्तदान श्रेष्ठ दान चा नारा देत मित्रपरिवार आपले सामाजिक दायित्व पार पाडणार आहे. 19 फेब्रुवारी रोजी सकाळी 9 वाजून 30 मिनिटांनी रक्तदान शिबिराला सुरवात होणार आहे.

शिवजयंती निमित्त उत्साहात पार पडणाऱ्या या विविध कार्यक्रमांना उपस्थित राहण्याचे आवाहन  दीपक चुटे, ऑड विनय घुडे, सचिन खंडारे, रुपेश भोयर, नितीन शिंदे, विलास आष्टेकर, विनोद वानखेडे, सोहमसिंग ठाकूर, प्रवीण होणाडे, प्रदीप शिंगरू, महेश राजुरकर, नरेश पाटणकर, आकाश सोनवणे, नरेश पेटकर, राजू शिंदे, नरेंद्र केदार,ललित इंगोले, संदीप वर्मा यांचेसह इतरांनीही केले आहे.