अखेर तुळजापूर (दहेगाव) येथे थांबली जलद रेल्वे

 तुळजापूर (दहेगाव) येथे जलद रेल्वे गाडीला थांबा

गावकऱ्यांनी विदर्भ राज्य आघाडीच्या नेतृत्वात केला जल्लोष

वर्धा : वर्ध्याच्या सेलू तालुक्यात येणाऱ्या तुळजापूर (दहेगाव) येथे जलद गाड्यांना थांबा मिळावा यासाठी नागरिक विदर्भ राज्य आघाडीच्या नेतृत्वात साखळी उपोषणाला बसले होते. शिक्षणासाठी दहेगाव येथून बाहेरगावी जाणाऱ्या विद्यार्थ्यांसाठी रेल्वे थांबा अत्यावश्यक असल्याने शाळकरी विद्यार्थी देखील मोठ्या संख्येत या आंदोलनात सहभागी झाले. 27 जानेवारी पासून हे उपोषण सुरू करण्यात आले होते. 26 दिवसाच्या उपोषण आंदोलनानंतर 25 गावांच्या प्रवासाचा प्रश्न मार्गी लागला आहे. अखेर  उपोषण आंदोलनाला यश आले आणि दहेगाव (तुळजापूर) येथे इंटरसिटी या गाडीला थांबा मिळाला आहे. शुक्रवारी सकाळी इंटरसिटी ट्रेन या गावाच्या रेल्वे स्थानकावर थांबली. त्यामुळे नागरिकांनी गाडीचे स्वागत करीत जल्लोष केला आहे.

नागपूर – वर्धा रेल्वे लाईनवर सिंदी रेल्वे जवळ तुळजापूर(दहेगाव) हे मोठे गाव आहे. सुमारे 25 छोटीमोठी गावे येथील रेल्वे स्थानकाशी जुळून आहे. दळनवळणाचे प्रमुख साधन येथे रेल्वे हेच आहे.  कोरोना काळ आला आणि रेल्वे मंत्रालयाने आणि अधिकाऱ्यांनी येथील रेल्वे थांबा बंद केला होता. केंद्र शासनाच्या अखत्यारीत येत असल्याने येथील नागरिकांनी खासदार रामदास तडस यांना अनेकदा निवेदने दिली. याशिवाय रेल्वे प्रशासनाला देखील निवेदने देत विनंत्या करण्यात आल्या होत्या.  काही दिवसांपूर्वी येथे रेल्वे रोको आंदोलन करून नागरिकांनी मागणीकडे लक्ष वेधले होते. परंतु केवळ आश्वासन देण्यात येत होती, त्यामुळे प्रशासन याकडे लक्ष देत नसल्याने 27 जानेवारी पासून विदर्भ राज्य आघाडीच्या नेतृत्वाखाली तुळजापूर रेल्वे स्थानकाच्या बाहेर हे साखळी उपोषण सुरू केले गेले. इंटरसिटी एक्स्प्रेस, जबलपूर एक्स्प्रेस, विदर्भ एक्स्प्रेस आणि मेल या गाड्या तुळजापूर  (दहेगाव) येथे थांबाव्या अशी मागणी करण्यात आली होती. गावातील शाळकरी मोठ्या संख्येने या आंदोलनात सहभागी झाले होते. विविध सामाजिक संघटनांनी देखील या आंदोलनाला पाठिंबा दिला होता. अखेर 26 दिवसाच्या उपोषणानंतर मागण्या मान्य करण्यात आल्या आहे.

शुक्रवारी अजनी – अमरावती – अजनी या गाडीने थांबा घेतला तेव्हा नागरिकांनी येथे एकच जल्लोष करण्यात आला आहे. यावेळी विदर्भ राज्य आघाडीचे जिल्हाध्यक्ष रामकीशन सिंघमधुपे व कार्यकर्त्यांसह खासदार रामदास तडस येथे उपस्थित होते. याच वेळी मेमु गाड्यांना पॅसेंजरचे दर लागू होणार असल्याची माहिती देण्यात आली.