सेलू येथील कृषी कार्यालयासमोर भजन सत्याग्रह

कृषी कार्यालय सुसज्ज बनवण्याच्या मागणीसाठी भजन सत्याग्रह

लोकप्रतिनिधींचे सतत झाले दुर्लक्ष

वर्धा : वर्धेच्या सेलू येथील कृषी कार्यालयासमोर किसान अधिकार अभियानचे अध्यक्ष सुदाम पवार यांच्या नेतृत्वात भजन सत्याग्रह करण्यात आला. जीर्ण झालेले सेलू येथील कृषी कार्यालय सुसज्ज बनवण्याच्या मागणीसाठी भजन सत्याग्रह करण्यात आला आहे. राजकीय लोकप्रतिनिधी चे येथे सतत दुर्लक्ष होत आले आहे.  अनेक दिवसापासून जीर्ण झालेल्या गोडाऊनमध्ये सेलू येथे कृषी कार्यालय सुरू आहे त्यामुळे शेतकऱ्यांना मोठ्या प्रमाणात असुविधेचा सामना करावा लागत आहे. जीर्ण झालेल्या इमारतीत सुरू असलेले कार्यालय हे बंद करून सुसज्ज असे कार्यालय सुरू करण्याच्या मागणीसाठी किसान अधिकार अभियान च्या कार्यकर्त्यांनी कृषी कार्यालयात जात भजन सत्याग्रह केला. यावेळी ‘आता पेटवू सारे रान’ यासारखे भजन गात सत्याग्रह करण्यात आला आहे.

सेलू तालुका हा कृषी विकासासाठी ओळखल्या जातो पण याच तालुक्यात शेतकऱ्यांकडे दुर्लक्ष होत असल्याचे दिसून येते. कधी शेतकऱ्यांना योग्य भाव मिळत नाही तर कधी व्यवस्थेकडूनच शेतकरी नाडवल्या जातोय. वेळोवेळी शेतकऱ्यांकडून आंदोलने होतात, पण आज सेलू येथे शेतकऱ्यांच्या एका आगळ्यावेगळ्या आंदोलनाने लक्ष वेधले आहे. नेमके हे आंदोलन शेतकऱ्यांनी का केले? याचीच चर्चा होते आहेय. सुदाम पवार यांच्या नेतृत्वात शेतकऱ्यांनी हातात टाळ घेत कृषी कार्यालयाच्या खस्ताहाल झालेल्या इमारतीकडे लक्ष वेधले आहे. कृषी कार्यालयातच टाळ वाजवून जीर्ण झालेल्या इमारतीकडे लक्ष वेधण्यात आले आहे. येथील इमारत ही फार जुनी आहे, पावसाळ्यात पाणी गळणे आणि पाणी कार्यालयात साचून राहण्यासारख्या समस्या येथील कर्मचाऱ्याना सहन कराव्या लागत आहेत.