गृहसंचासाठी जमलेली झुंबळ म्हणतेय डीबीटी प्रणालीने खात्यावर लाभ द्या

किचन सेट वितरणाच्या योजनेत डी बी टी तत्वाला फासलाय हरताळ

घोटाळे करण्यासाठी डीबीटी तत्व ठेवले जाते बाजूला

आशिष इझनकर

वर्धा  : वर्ध्यात बांधकाम कामगाराना किचन सेटचे वाटप इमारत बांधकाम कामगार कल्याण मंडळाकडून केले जात आहे. यासाठी पहाटे तीन वाजतापासून कामगार रांगा लावत किचन सेट मिळण्याची प्रतीक्षा करीत आहे. पण डी बी टी तत्वाला हरताळ फासत हे वाटप करण्यात येत असल्याचा आरोप या वितरणात होताना दिसून येत आहे. पारदर्शक व्यवहारासाठी थेट कामगारांच्या खात्यावर लाभ देण्याचे निर्देश असताना डी बी टी तत्वालाच बाजूला सारले जात आहे. थेट बँक खात्यात लाभ या पद्धतीला हरताळ फासला जात आहे.ज्या देवळी तालुक्यातील इसापूर या ठिकाणाहून वाटप केला जात आहे, तेथे कुठल्याही सुविधा नसल्याचा आरोप कामगार संघटनांकडून करण्यात आला आहे. तर महामार्गावर याचे वाटप होत असल्याने येथे अपघाताची शक्यता देखील निर्माण झाली आहे.

राज्य इमारत आणि बांधकाम कल्याणकारी मंडळाच्यावतीने बांधकाम कामगारांना किचन सेटचे वितरण करण्यात येत आहे. हे वितरण जिल्ह्यात एकाच ठिकाणी होत असल्याने कामगारांची चांगलीच गर्दी होत आहे. होत असलेले वितरण वर्धा-यवतमाळ मार्गालगत असलेल्या इसापूर येथील कामगारांच्या मध्यान्ह भोजनाच्या सेंट्रल किचनच्या शेजारी होत आहे. रस्त्यालगत होत असलेल्या या वितरणामुळे अपघाताची शक्यता नाकारता येत नाही.

जिल्ह्यात होत असलेले वितरण एकाच ठिकाणी होत असल्याने मोठ्या प्रमाणात गर्दी होत आहे. शिवाय, योजनेचा लाभ घेण्याकरिता येत असलेल्या कामगारांना इतर तालुक्यातून आपली कामे सोडून तिकिटाचा खर्च करून यावे लागते. याचा त्यांना फटका बसतो.

जिल्ह्यात बांधकाम कामगारांची संख्या ही प्रचंड आहे. ‘किचन सेट वाटप’ एकाच ठिकाणी सुरू होते त्यामुळे तेथे हजारावर बांधकाम कामगारांची गर्दी निर्माण झाली आहे. यामुळे येथे प्रचंड गोंधळ उडाला .

कामगार व त्यांची वाहने महामार्गावर उभी राहत असल्याने येथे वाहतुकीची अडचण निर्माण झाली आहे. या वाटपात होत असलेली गर्दी हाताळण्याकरिता येथे वाहतुक पोलिस नाही, किंवा तत्सम यंत्रणा नाही. अशात या मार्गावर अपघात होण्याची शक्यता निर्माण झाली. अनर्थ टाळण्याकरिता होणारे वितरण तालुकास्तरावर करण्याची मागणी होत आहे.

या ‘किचन सेट’ वाटपाकरिता जिल्ह्यातील कारंजा, आष्टी, समुद्रपूर, गिरड हे अंतर वाटप सुरू असलेल्या इसापूर (देवळी) येथून १०० ते १२० किलोमीटर अंतर आहे. या अंतरावरून येथे कामगार आले आहेत. किचन सेटकरिता कामगारांना उन्हात उभे राहावे लागते. पिण्याचे पाणी, बसण्याची सोय, वाहने पार्किंगची व्यवस्था नाही. दररोज ही गर्दी वाढतच जाणार आहे. जिल्हा कामगार अधिकाऱ्यांनी प्रत्यक्ष वाटप स्थळावर जाऊन त्याचा आढावा व सोई-सुविधांची पाहणी करणे गरजेचे आहे. दुरवरून सकाळपासून आलेला कामगार तेथे उपाशी राहतो, सदर स्थळ गावाबाहेर असल्याने तेथे कुठलीही सुविधा नाही.

सुविधा पुरविण्याची मागणी

किचन सेट घेण्याकरिता येणाऱ्या कामगारांकरिता येथे कुठलीही सोय नाही. येथे दूर अंतरावरून येत असलेल्या कामगारांकरिता स्वच्छतागृहाची व्यवस्था करावी, तसेच कामगारांकरिता येथे मध्यान्ह भोजन सुरू करावे, अशी मागणी करण्यात आली, या सोबतच सुरू असलेले वितरण तालुकास्तरावर करण्याची मुख्य मागणी करण्यात आली आहे.

कामगारांना योजनांचा लाभ देताना तो वस्तू स्वरूपात न देता थेट डीबीटीच्या स्वरूपात देण्यात यावा, असे आदेश पंतप्रधान आणि कामगार सचिवालयाकडून देण्यात आले होते. असे असताना महामंडळाकडून त्या आदेशाला बगल देत पुन्हा वस्तु स्वरूपात वितरण करण्यात येत असल्याचा आरोप कामगार नेते मनीष गौरखेडे आणि सुनील धोबे यांनी केला आहे.