जलतरण तलावात बुडून पंधरा वर्षीय बालकाचा मृत्यू

हिंगणघाट येथील  स्वीमिंग पूल येथील घटना

हिंगणघाट :  वर्धा जिल्ह्याच्या हिंगणघाट येथील मोहता स्वीमिंग पूल  येथे 15 वर्षीय बालकाचा जलतरण तलावात पाण्यात बुडून मृत्यू झालाय.रेहान मेहनुद्दीन चौधरी असं मृत बालकाच नाव आहे.नवव्या वर्गात शिकणारा रेहान हा सायंकाळी आईसोबत स्विमिंग शिकायला हिंगणघाटच्या जलतरण तलाव येथे गेलाय. त्याचा स्विमिंगचा पहिलाच दिवस होता. या जलतरण तलावात असलेले पाणी हिरवे होते, त्यामुळे बुडालेल्या मुलाला शोधणे देखील कठीण झाले.

मूळचे उत्तर प्रदेश येथील चौधरी कुटुंब तीन वर्षापासून हिंगणघाट शहरात राहायला आले आहे. मुजुमदार वॉर्ड येथे राहणाऱ्या रेहान चौधरी याच्या वडिलांचा येथे बेकरीचा व्यवसाय आहे. स्विमिंग शिकण्याची मुलाची इच्छा पूर्ण करण्यासाठी आई वडिलांनी धडपड केली. हिंगणघाट येथील स्विमिंग पूल येथे प्रवेश घेतला, पहिल्याच दिवशी स्विमिंग शिकण्यासाठी पोहचलेल्या रेहनला पाण्यात पोहता आले नाही, शिवाय पाणी अशुद्ध असल्याने पाण्याचा रंग देखील हिरवा असल्याची माहिती आहे. त्यामुळे बुडालेल्या रेहनला शोधणे कठीण झाले. चार ट्रेनर असतानाही पोहणे शिकायला आलेल्या रेहानला व्यवस्थापन सांभाळू शकले नसल्याने संताप व्यक्त केला जात आहे. स्वीमिंग पूल व्यवस्थापनाचे दुर्लक्ष भोवले असल्याने संताप व्यक्त होत आहे.याप्रकरणी पोलिसांनी गुन्हा दाखल केला असून तपासाला सुरवात केली. या घटनेमुळे सगळीकडे हळहळ व्यक्त केली जातं आहे.