अमीर म्हणतोय…मी बापूंचा फॉलोअर

सेवाग्राम आश्रम येथे अभिनेता अमीर खान यांची भेट 

पाणी फाऊंडेशनच्या कार्यक्रमाला आले असता आश्रम परिसरात भेट देऊन घेतली माहिती 

वर्धा : आपल्या अभिनयाने चाहत्यांना भुरळ घालणारा बॉलिवूड अभिनेता अमीर खान याने सेवाग्राम आश्रमात भेट दिली. सेवाग्राम आश्रमात काही वेळ थांबून तेथील स्वयंसेवकांशी चर्चा केली. बापूच्या कुटीमधील विविध वस्तू आणि सेवाग्राम आश्रमाचे देशाच्या स्वातंत्र्य चळवळीत असणारे स्थान याबाबत समजून घेण्याचा प्रयत्न आज अमीर खान याच्याकडून झाला आहे. यावेळी माध्यमांशी बोलताना अमिरने आपण आधीपासूनच बापूंचे फॉलोअर आहोत, आणि आज सेवाग्राम येथे आल्यावर या स्थळाची ऊर्जा काय आहे हे कळले आहे, अशी प्रतिक्रिया दिली आहे.

 अभिनेता अमीर खान याने वर्ध्याच्या सेवाग्राम आश्रम येथे भेट दिली. सत्यमेव जयते वॉटर कप स्पर्धेच्या निमित्ताने वर्ध्यात आलेला अमीर खान बापू कुटी येथे पोहचला. आश्रमच्या वतीने सूतमाळेने स्वागत करत अमीर खान यांना चरखा भेट दिला गेला.

 यावेळी आश्रमात प्रथमच आलो असून येथे येऊन आनंद झाला, असं अमीर खान म्हणाला. सेवाग्राम आश्रमात प्रथमच आलो आहे. येथे प्रवेश करताच वेगळीच ऊर्जा अनुभवायला मिळाली. मी गांधीजींचा मोठा फॉलोअर आहे. बापूंच्या विचारांचा माझ्यावर मोठा प्रभाव आहे. मला मोठा आनंद होत आहे की जिथे बापूजी दीर्घ काळ राहिलेत. ज्या गोष्टी त्यांनी वापरल्या त्या पाहून वेगळीच अनुभूती आली, ते मी शब्दात सांगू शकत नाही. येथे येऊन मला मोठा आनंद झाला आहे.