स्वातंत्र्यानंतरचा काळ विधायक नेतृत्वाचा – शरद पवार

जेष्ठ नेते शरद पवार आणि नितीन गडकरी एकाच मंचावर

वर्धा : गांधी-विनोबांचा वारसा लाभलेल्या वर्धा जिल्ह्यामध्ये स्वातंत्र्यानंतर बापूरावजी देशमुख, बाबासाहेब धांदे, संतोषराव गोडे, केशवराव झाडे अशी विधायक नेतृत्व करणारी पिढी तयार झाली. त्यांनी जिल्ह्यात राजकारणासोबत समाजकारण करीत विधायक कामाचा डोंगर उभा केला. याच विधायक कामातून शहर तसेच ग्रामीण भागाचा विकास झाला. यात शिक्षण क्षेत्रात झालेले काम महत्वाचे ठरले. असे वक्तव्य राष्ट्रवादी काँग्रेसचे जेष्ठ नेते शरद पवार यांनी केले. वर्ध्यात माजी आमदार सुरेश देशमुख यांच्या अमृत महोत्सवी वर्षानिमित्त सांगता सामारोह कार्यक्रमात बोलत होते.यावेळी मंचावर सुरेश देशमुख यांच्या पत्नी स्वातीताई देशमुख यांच्यासह या सांगता समारोहाचे प्रमुख पाहुणे केंद्रीय रस्ते व वाहतूक मंत्री मा. ना. नितीन गडकरी, माजी खा. दत्ताजी मेघे, माजी मंत्री अनिल देशमुख, वर्धेचे खासदार अमर काळे, माजी खा. रामदास तडस, आमदार प्रकाश गजभिऐ, आमदार सुभाष धोटे हे मान्यवर उपस्थित होते.

पुढे बोलताना ते म्हणाले की, हेच विधायक कार्य व समाजकारणाचा वारसा सुरेश देशमुख यांनी समर्थपणे चालविला. शिक्षणाच्या क्षेत्रात यशवंतराव चव्हाण यांच्या नावाने बापुरावजींनी उभ्या केलेल्या संस्थेचा विस्तार करण्याचे काम सुरेशभाऊंनी केले त्यातून शिक्षितांची पिढी बाहेर पडली हे सुरेशभाऊंचे योगदान आपणास लक्षात ठेवावे लागेल. सहकार क्षेत्रातील आशिया खंडातील एक मोठी बँक असलेल्या राज्य शिखर बँकेचे नेतृत्व बापूरावजींनी केले व नंतर सुरेश देशमुख ब्यानी सुद्धा केले. एकाच कुटुंबातील सदस्यांनी दोन वेळा नेतृत्व करण्याचे दुसरे उदाहरण राज्यात नाही. माजी केंद्रीय मंत्री तथा राष्ट्रवादी काँग्रेस पार्टी (शरदचंद्र पवार) चे राष्ट्रीय अध्यक्ष शरद पवार यांनी वर्धेचे माजी आमदार तथा यशवंत ग्रामीण शिक्षण संस्थेचे माजी अध्यक्ष, सुरेश देशमुख यांचा गौरव केला. यावेळी शाल, श्रीफळ व मानपत्र देऊन व पुष्पहार घालून सुरेश व स्वातीताई देशमुख यांचा सत्कार शरद पवार व नितीन गडकरी यांच्या हस्ते करण्यात आला तसेच लोकांनी जमा केलेल्या कृतज्ञता निधीचा चेक त्यांच्या सुपूर्द केला.
याप्रसंगी बोलताना नितीन गडकरी म्हणाले की, राजकारणापेक्षा राष्ट्रकारण महत्त्वाचे आहे, राष्ट्रकारणात समाजकारण आहे त्यात खऱ्या अर्थाने सेवाकारण आहे. राजनीती, लोकनीती, धर्मनिती हे राजकारणाचे वर्णन आहे, पण सध्याच्या प्रचलित वातावरणात सत्ताकारण पावर पॉलीटिक्स यालाच लोक राजकारण समजतात. पण यापुढे जात दलित, शोषित, पिडीत, शेतकरी, शेतमजूर, असहाय्य अनाथ यांचा विचार करणारे नेतृत्व आणि कार्यकर्ता ही खऱ्या अर्थाने आपल्या देशाची समाजाची आवश्यकता आहे, त्याच मालिकेत सुरेशभाऊ देशमुख बापूरावजींचा वारसा घेऊन जगले काम करीत राहिले. नम्रता, शालिनता, सुसंस्कृतपणा, सहजता, सह्दयता हे सूरेशभाऊंच्या स्वभावाची विशेषता आहे असेही गडकरी म्हणाले.

तर सुरेश देशमुख यांनी राजकारणात कुणी शत्रु नाही, त्यांचे व्यक्तीमत्व हे अजातशत्रु आहे असे खा. अमर काळे म्हणाले. याप्रसंगी दत्ताजी मेघे, अनिल देशमुख यांनीही आपल्या मनोगतातून सुरेशभाऊ देशमुख यांच्या कार्य व स्वभाव गुणांचा गौरव करुन त्यांचे अभीष्टचिंतन केले. यावेळी सत्काराला उत्तर देतांना सुरेशभाऊ म्हणाले की, आमचे वडील गेल्यानंतर आम्हाला सांभाळुन घेण्याचे काम पवार साहेबांनी केले तर संकट काळात गडकरी साहेबांनी मदत केली. पवार साहेबांनी व लोकांनी मला भरपूर काही दिले, माझ्या पत्नीनेही मला मोलाची साथ दिली.

‘लोकनेता’ हा गौरवांक सुध्दा याप्रसंगी मान्यवरांच्या हस्ते प्रकाशित करण्यात आला. या कार्यक्रमाचे प्रास्ताविक माजी मंत्री, राजेंद्र शिंगणे यांनी केले तर भूमिका डाॅ. विलास देशमुख यांनी मांडली, संचलन डॉ. प्रमोद नारायणे यांनी केले तर आभार प्रदर्शन युवा नेते समीर देशमुख यांनी केले.
या समारंभास आयोजन समिती सदस्य हर्षवर्धन देशमुख (अमरावती), गिरीश गांधी (नागपूर), सुभाष धोटे (राजुरा) संतोषराव कोळपे (अकोला), अरविंद पोरेड्डीवार (गडचिरोली), राजेंद्र जैन (गोंदिया), प्रवीण देशमुख (राळेगाव) तसेच शेखर शेंडे, राजू तिमांडे यांच्यासह सुरेशभाऊंच्या नातवंडासह कुटुंबातील शरद देशमुख, समीर देशमुख, डाॅ. संदीप देशमुख, स्मिताताई देशमुख, प्रियंकाताई देशमुख, शितलताई देशमुख, डॉ. अनिता देशमुख, साहिल देशमुख, डाॅ. सोनम देशमुख, प्रा. दिलीप देशमुख व वर्धा जिल्ह्याच्या विविध भागातून आलेले राजकीय, सामाजिक, सहकार, सांस्कृतिक, व्यापारी व शिक्षण क्षेत्रातील गणमान्य व्यक्ती, पदाधिकारी, कार्यकर्ते, कर्मचारी तसेच नागरिक मोठ्या संख्येने उपस्थित होते. कार्यक्रमाच्या यशस्वीतेसाठी प्राचार्य डॉ. गिरीश ठाकरे, डॉ. विजय बोबडे यांनी विशेष परिश्रम घेतले.