वर्धेत टायरच्या दुकानाला आग ;  तब्बल आठ तास अग्नितांड

जवळपास दीड कोटींचे नुकसान

वर्धा : वर्धा शहरातील पावडे चौक येथे असलेल्या एस मार्ट  मॉल आणि टायरच्या दुकानाला आग लागली आहे. एस मार्ट या मॉलच्या खाली तळघरात असलेल्या टायरच्या मोठ्या शो रूम  दुकानाला शुक्रवारी सकाळी आठ वाजताच्या  सुमारास अचानक आग लागली.  टायरच्या दुकानाला लागलेली आग सर्वत्र पसरली. टायर सतत जळत राहिले सोबतच एस मार्ट मध्ये असलेले तेलाचे पिंप देखील मोठ्या संख्येत जळाल्याने आग विझविण्यासाठी बरेच प्रयत्न करावे लागले.

 सकाळी 8 वाजता लागलेली आग सायंकाळी 4 वाजेपर्यंत धगधगत होती. अग्निशमन दलाच्या जवानांनी 60 ते 70 गाड्या पाण्याचा मारा केल्यानंतर ही आग आटोक्यात आली. या घटनेमुळे परिसरातील नागरिकांमध्ये मोठी धाकधूक निर्माण झाली होती.

पावडे चौकात प्रवीण सेठीया यांचे एस मार्ट नावाची सुपर शॉपी आहे तर राजेश साहू यांचे त्याच इमारतीच्या तळघरात टायरचे होल सेल दुकान आहे. यासोबतच साहू यांची ऑईल आणि बॅटरीची एजन्सी आहे. या तळघरात टायरसोबतच आईल आणि बॅटर्‍याही ठेवून होत्या. दरम्यान, आज सकाळी 8 वाजता शॉर्टसर्किटमुळे साहू यांच्या दुकानाला आग लागली. आगीची माहिती मिळताच पोलिसांची मोठी कुमक घटनास्थळी दाखल झाली. आग विझविण्यासाठी अग्निशमन दलाला पाचारण करण्यात आले. टायर असल्यामुळे मोठ्या प्रमाणात काळा धूर निघत होता. दुकानाला लागूनच जनित्र असल्याने मोठी दुर्घटना घडू नये यासाठी वीज वितरण विभागाने परिसरातील वीज पुरवठा तात्पुरता बंद केला होता. आगीचे रौद्ररुप बघता तेथे उपस्थित माजी खासदार रामदास तडस यांनी प्रशासनाला अलर्ट केले. निवडणूक प्रचाराचा काळ असतानाही घटनास्थळ गाठून प्रशासनाला आवश्यक त्या सूचना केल्या. वर्धा नगरपालिका, देवळी नगरपालिका, पुलगाव नगरपालिका, पुलगाव आगार आणि उत्तम गालवा येथील अग्निशमन दलाचे वाहन घटनास्थळी दाखल झाले. सकाळी 9 वाजतापासून सायंकाळी 4.30 वाजेपर्यंत अग्निशमनच्या बंबाने पाण्याचा मारा करीत ही आग आटोक्यात आणली. यासाठी जवळपास 60 ते 70 गाड्या यासोबतच राख वहन करणार्‍या कॅप्सूल ट्रकमध्येही पाणी आणून ही आग विझविण्यात आली.

तळघरात टायरच्या दुकानाला लागलेल्या आगीने वरच्या मजल्यावरील एस मार्ट सुपर शॉपीला कवेत घेतले. दुपारच्या सुमारास एस मार्टमध्ये ठेवून असलेल्या तेलाच्या जवळपास 100 पिंपाचा अचानक स्फोट झाला. या स्फोटात शॉपीमधील सर्व किराणा व धान्य साहित्य जळून खाक झाले. या दुकानालगत असलेल्या स्टार बॅटरी नावाचे दुकान आहे. दुकान चालकाने सर्व साहित्य तत्काळ हलविले तर पुढील अनर्थ टाळण्यासाठी लगतच्या घर मालकांनी किमती साहित्य इतरत्र हलविले होते. आज दिवसभर नागरिकांनी घटनास्थळी मोठी गर्दी केली होती. विशेष म्हणजे, सध्या निवडणुकीचा प्रचार सुरू असताना रिंगणात असलेल्या उमेदवारांनीही सोयीचा वेळ काढून घटनास्थळी भेट देत माहिती जाणून घेतली. या अग्नितांडवात राजेश साहू यांचे दीड कोटींच्या जवळपास तर एस मार्टचे संचालक प्रवीण सेठीया यांचे 50 लाखांच्या घरात नुकसान झाले आहे.