‘ग्रेट बकॅयार्ड बर्ड काउटं’ ला वर्धेत 146 पक्षी प्रजातींच्या नोंदी
वर्धा : ग्रेट बकॅयार्ड बर्ड काउटंच्या निमित्याने वर्धा जिल्ह्यातील विविध अधिवासात पक्षी निरीक्षकांनी केलेल्या पक्षी निरीक्षणात 146 पक्षी प्रजातींच्या नोंदी घेवून त्या ईबर्ड डॉट ओआरजी या संकेत स्थळावर नोंदवण्यात आल्या. वर्धा जिल्ह्यात आढळणाऱ्या एकूण प्रक्षी प्रजाती पैकी 48 टक्के प्रजातींचे दर्शन या चार दिवसीय पक्षी गणनेमध्ये झाले. आंतरराष्ट्रीय स्तरावर दरवर्षी राबविण्यात येणाऱ्या ग्रेट बकॅयार्ड बर्ड काऊंट मधील कॅम्पस बर्ड काऊंट सेवाग्रामच्या दवाखान्याच्या परिसरात पक्षी निरीक्षण करत 40 पक्षी प्रजाती नोंदविण्यात आल्या.
यात पक्षी अभ्यासक राहुल वकारे आणि पवन दरणे यांना बोर धरणाच्या परिसरात टिकेलचा लीफ वार्बलर आढळला. याचे शास्त्रीय नाव फिलोस्कोपस ऍफिनिस असे आहे. ही वर्धा जिल्ह्यातील पहिलीच नोंद आहे. या नोंदीने वर्धेच्या आणि बोर व्याघ्र प्रकल्पाच्या पक्षी वैभवात भर पडली आहे.
भारतामधील 37 राज्यांनी आपला सहभाग नोंदविला असून 389 पक्षी प्रजातींसह महाराष्ट्र पाचव्या स्थानावर आहे. यावर्षी पहिल्यांदाच महाराष्ट्रातील सर्व छत्तीस जिल्ह्यांनी ग्रेट बकॅयार्ड बर्ड काउटंमध्ये आपला सहभाग नोंदविला. महाराष्ट्रात वर्धेचे स्थान तेराव्या क्रमांकावर आहे.
वर्धेत नोंदवण्यात आलेल्या पक्षी प्रजातींमध्ये जागतिक आययुसीएन या संघटनेद्वारे वर्गीकरण करण्यात आल्यानुसार असुरक्षित वर्गात मोडणारे नदी सुरय, संकट समीप वर्गातील मोठा करवानक, काळ्या शेपटीचा पाणटीवळा, तिरंदाज, काळा शराटी, पांढऱ्या मानेचा करकोचा व करण पोपट हे आढळले.
वर्धा येथील रोठा तलाव, दिग्रस तलाव, बोर वाघ्र प्रकल्पाजवळील भाग, जामणी येथील मदन धरण, आर्वी येथील सारंगपुरी तलाव व शासकीय तंत्रनिकेतन कॉलेज, सेवाग्राम येथील दवाखान्याचा परिसर अश्या विविध परिसरात पक्षी निरीक्षणांनी पक्ष्यांच्या नोंदी घेतल्या.
यात महाराष्ट्र पक्षिमित्र संघटनेचे कार्यकारी सदस्य दिलीप विरखडे, विदर्भ समन्वयक राहुल वकारे, डॉ. चेतना उगले, मनीष ठाकरे, सफल पाटील, श्रीकांत वाघ, पवन दरणे, शंतनू बोरवार, प्रियांका नेहेते, प्रकाश भोयर आणि विनोद साळवे यांनी पक्ष्यांच्या नोंदी केल्या.
महाराष्ट्र पक्षिमित्र संघटनेचे अध्यक्ष डॉ. जयंत वडतकर, डॉ. गजानन वाघ, किरण मोरे, डॉ. सुधाकर कुऱ्हाडे, वनविभागाचे माजी वनपाल अशोक भानसे, प्रशांत काकडे, अविनाश भोळे तसेच अनेक पक्षीमित्रांनी अभिनंदन केले.
